ஸ்ரீ ஹயக்ரீவரின் வண்ணமே !
என் எண்ணம் எல்லாம் வண்ணமே !
காரணம் அது என்னவோ?
வண்ணமாகக் காரணம்…
நாரணன் அவதாரமோ ?
காக்கும் கடவுள் திருமால் கொண்டது
ஈரைந்து அவதாரமே !
அதையும் தாண்டி பெருமை கொண்டது ஸ்ரீஹயக்ரீவ அவதாரமே !
(என் எண்ணம் எல்லாம் வண்ணமே !)
தெள்ளிய வானின் வண்ணமே ! – அலை
துள்ளிடும் ஆழியின் வண்ணமே !
வில்லினை ஏந்திடும் ஸ்ரீஜெயராமனின் வண்ணமே !
நீலமே ! அது நீலமே !
உலகெலாம் அது நீளுமே!
(என் எண்ணம் எல்லாம் வண்ணமே !)
இரவுப் பொழுதின் வண்ணமே ! – மழைக்
கொணரும் முகிலின் வண்ணமே !
புல்லாங்குழல் கொண்ட கோகுலக் கண்ணனின் வண்ணமே !
கருமையே ! அது கருமையே !
உணர்த்திடும் ஒளியின் அருமையே !
(என் எண்ணம் எல்லாம் வண்ணமே !)
சுத்தம் பூசிடும் வண்ணமே ! – நல்
அமைதியும் பேசிடும் வண்ணமே !
புத்தகம் ஏந்திடும் ஸ்ரீஹயக்ரீவனின் வண்ணமே !
வெண்மையே ! அது வெண்மையே !
அவன் மனம் அதுவும் வெண்மையே !
(என் எண்ணம் எல்லாம் வண்ணமே !)